Kanada mətbuatı enerji sahəsində Azərbaycan-İsrail əməkdaşlığından yazıb

Bakı, 20 iyun, İMZAİNFO
Kanadanın nüfuzlu “Thej.ca” yəhudi media platformasında “İsrail enerji tələbatının artması ilə əlaqədar Azərbaycana müraciət edir” sərlövhəli məqalə dərc olunub.
Diasporla İş üzrə Dövlət Komitəsindən İMZAİNFO-ya bildirilib ki, siyasi şərhçi Reyçel Avrahamın qələmə aldığı məqalədə cari il iyunun 1-3-də Azərbaycanda təşkil olunmuş və Xəzər dənizi bölgəsinin neft-qaz və enerji sektorunda ən nüfuzlu tədbir hesab olunan Bakı Enerji Həftəsində ümumilikdə 31 ölkədən 250 şirkətin iştirak etdiyi, yekun sessiyanın isə Azərbaycanın mədəniyyət paytaxtı Şuşada keçirildiyi diqqətə çatdırılıb.
Müəllif qeyd edib ki, Azərbaycan artıq İsrail dövlətinin enerji ehtiyacının 40 faizini təmin edir. Ukrayna böhranının alovlanmasından etibarən bir çox İsrail rəsmisi Azərbaycandan daha çox neft və qaz alınmasına çalışır. Bu, İsrailin maliyyə naziri Aviqdor Libermanın Bakıya son səfəri zamanı gündəmdə olan məsələlərdən biri olub, habelə məhz Azərbaycandan aldığı neft və qazın həcmini artırmaq məqsədilə İsrail tərəfi Bakı Enerji Həftəsində təmsil olunub.
İsrailin Azərbaycandakı səfiri Corc Dikin, Beynəlxalq Enerji Forumunun baş katibi Cozef Makmoniqlın, Azərbaycanın energetika naziri Pərviz Şahbazovun fikirlərinin yer aldığı məqalədə, həmçinin qeyd edilib ki, səfirlik vasitəsilə 10-15 İsrail şirkəti Qarabağdakı layihələrdə iştirak üçün müraciət edib. Ukrayna böhranından sonra bir çox ölkə enerji ehtiyaclarını ödəmək üçün mübarizə apardığı və dünyanın enerji sektorunda çətinliklərin yaşandığı bir vaxtda maraqlı tərəfləri bir araya gətirən Bakı Enerji Həftəsi qlobal enerji böhranı üçün əla həll yolu ola bilər. Həmçinin diqqətə çatdırılıb ki, tarix boyu mənəvi enerji mənbəyi olan Şuşa artıq yaşıl enerji zonasına çevrilir və bunun daha bir təsdiqi 4 min meqavat gücündə külək və günəş enerjisi layihələri üzrə əməkdaşlıq haqqında sənədin imzalanması məkanı olaraq Şuşanın seçilməsidir. Sözügedən milyardlarla dollarlıq sərmayələrin əksəriyyətinin işğaldan azad edilmiş ərazilərimizə yönəldilməsi Azərbaycanın investorlar üçün cəlbediciliyinin nümayişidir.

Paylaş