SOCAR peşə təhsili almaq istəyən gənclər arasında müsabiqə elan edib

Bakı, 7 oktyabr,  İMZAİNFO

SOCAR-ın Qobustan Regional Təlim Mərkəzi, Kadr hazırlığının təşkili Mərkəzi, Qala Təlim, Tədris Mərkəzi və Sumqayıt Təlim, Tədris Mərkəzinə şagird qəbulu üçün müsabiqə keçirilir.

Şirkətdən  İMZAİNFO-ya bildirilib ki, dekabrın 1-dək 29 yaşı tamam olmayan, tam orta, peşə və ya orta-ixtisas təhsilli Azərbaycan Respublikasının vətəndaşları müsabiqədə iştirak edə bilərlər. “Atıcı” peşəsi üzrə iştirak etmək istəyənlər hərbi xidmət keçməlidirlər. Digər peşələr üzrə müsabiqədə iştirak etmək istəyən kişi cinsindən olan şəxslər həqiqi hərbi xidmət keçməsindən asılı olmayaraq hərbi bilet, tibb müəssisəsindən sağlamlıq haqqında arayış, rentgen flüoqrafiyası, şəxsiyyət vəsiqəsi, attestat/diplom, Sumqayıt şəhəri və Abşeron rayonunda yaşayan məcburi köçkünlər isə məcburi köçkün vəsiqəsini təqdim etməlidirlər.

Təlim Mərkəzlərinə aparatçı, atıcı, avtomobil təmiri çilingəri, defektoskopçu, əl ilə qaynaqda elektrik qaynaqçısı, elektrik avadanlıqlarına xidmət və bu avadanlıqların təmiri üzrə elektrik montyoru, elektrik qaz qaynaqçısı, kimyəvi ayırma aparatçısı, kimyəvi təhlil/analiz laborantı, kompressor qurğuları maşinisti, nasos qurğusu maşinisti, neft-qaz hasilatı üzrə operator, nəzarət ölçü cihazları və avtomatika üzrə çilingər, polad və dəmir konstruksiyaların quraşdırıcısı, qaz avadanlıqlarının istismarı və təmiri üzrə çilingər, qaz paylayıcı stansiyanın operatoru, qazla kəsən, rəngsaz, takelajçı, təmirçi çilingər, tornaçı, frezerçi, yükləyici sürücüsü, qaz təsərrüfatında qəza-bərpa işləri üzrə çilingər, yeraltı qaz kəmərlərinin istismarı və təmiri üzrə çilingər peşə ixtisasları üzrə ümumilikdə 765 şagirdin qəbulu nəzərdə tutulub. Təhsil müddəti peşədən asılı olaraq 6 ay və ya 1 ildir.

Müraciətlər elektron formada qəbul olunur. “www.socar.az” internet səhifəsinin “Karyera” bölməsinin “Təlim mərkəzlərinə sənəd qəbulu” keçidinə daxil olmaqla tələb edilən sənədlər və müsabiqənin qaydaları haqqında məlumat almaq və müvafiq qaydada müraciət etmək mümkündür. Müraciətlər oktyabrın 22-dən gec olmamaq şərti ilə qəbul ediləcək.

Təhsil müddətində şagirdlərə aylıq təqaüd, xüsusi yay və qış geyimləri, gündəlik nahar veriləcək. Qəbulla bağlı hər hansı sualı olan vətəndaşlar “tis@socar.az” elektron poçt ünvanı ilə əlaqə saxlaya bilərlər.

Paylaş